اليوم وصل لي ايميل من مسؤول في شركة بريفيل الأسترالية بخصوص الخلاط اللي شريته من الغانم وعليه كفالة خمس سنوات من المصنع ولكن الغانم يعطي كفالة سنة.
الايميل يقول انه الغانم له الحق بتحديد مدة الكفالة وغير ملزم بكفالة المصنع، ولكن ملزم بقوانين التجارة المحلية في الكويت
مدير حماية المستهلك في الكويت قال لي أنه على الموزع أو الوكيل الالتزام بالكفالة الأصلية من المصنع!! كفالة المصنع خمس سنوات، الحين شنو لازم يصير، هل أقدم شكوى لحماية المستهلك ولا كفالة سنة من حق الغانم؟! نحتاج رأي قانوني.
قبل جم يوم شريت خلاط بريفيل من الكترونيات الغانم وكان في لزاق على الكرتون مغطين فيه شيء، صراحة شكيت في الوضع، رجعت البيت وقمت احك اللزاق لما وخرته، المهم طلع انه تم تغطية الكفالة الأصلية من المصنع وهي عبارة عن 5 سنين، بس الغانم يعطيك سنة، و على كل سنة إضافية تدفع مبلغ زيادة!!
المهم كتبت استفسار للغانم، بس بدون فائدة، دقوا على ويقولون لي خلاطك خربان؟ أنا داز لهم استفسار عن شيء ملزمين فيه بقانون التجارة وهو، على الموزع أو الوكيل الالتزام بالكفالة الأصلية من المصنع، وهذا الكلام مو من عندي، هذا كلام مدير إدارة حماية المستهلك.
المهم، لأنه ولا شيء صار انا بعثت ايميل حق شركة بريفيل الأسترالية وقلت لهم عن موضوع الكفالة، وهل في اتفاق بينكم وبين الغانم لتغطية الكفالة؟ اليوم وصل لي رد انه تم إرسال رسالتي إلى مدير التسويق العالم لشركة بريفيل، وحالياً انا ناطر تطورات المسألة، اللي يزعج انه إلكترونيات الغانم لم تأخذ شكوتي على محمل الجد.
اليوم بالليل راح يبطل مطعم شيك شاك للبرجر، يقولون ان اهل نيويورك المشغولين جداً يوقفون علشانه من كثر ما هو لذيذ، هل راح يغلب الملك بالنسبة لي (جوني روكتس)؟
قبل جم يوم ولد خالتي كلمني عن مطعم اسمة كوزينوز, المطعم من طقت شلوتزكي و صب واي بس شكله وايد طيب, اليوم عرفت إنه كان موجود في برج بيتك في 2008 بس سكر
هذي صورة من المنيو الامريكي
وطريقة المطعم من داخل تكون جذي
المطعم موجود خلف مجمع أولومبيا, على الشارع الداخلي من الخلف, وعلى فكرة مطعم بافالوز فتح من جديد في مكانه القديم
Caveman007's Blog 